بينتقل فيروس كورونا بطريقة مباشرة بواسطة رذاذ الكحة والسعال وبطريقة غير مباشرة عن طريق نقل العدوي باليد إلى الأنف أو العين أو الفم
حتى الأن لا يوجد مصل واقي من كورونا، ولكن الحل المؤكد لتقليل فُرص من الإصابة هو النظافة الشخصية نعم النظافه الشخصيه من أهم طرق النجاه من الإصابه وعليك بالأتي :
- غسل اليدين بإستمرار بالماء والصابون لمدة ٢٠ ثانية علي الأقل أو إستخدام الكحول عند عدم توافر الماء والصابون.
- عدم لمس الوجه إلا بعد غسل اليدين < الموضوع صعب جداً بس إحنا نقدر نتعود عليه >.
- إستخدام مناديل ورقية عند العطس أو الكحة ورميها مباشرة بعد الإنتهاء وغسل اليدين، وبلاش من القماش اللى بيستعمل أكتر من مره، لو مش معايا منديل ورق يبقى استخدم الكوع.
- تجنب ملامسة الأسطح ما لم تكن مضطراً لذلك. مثلاً ممكن تدفع الأبواب بضهرك بدلاً من إيدك !!
- السلام الشفوي أو التلويح باليد بلاش المصافحة والأحضان.
- إبتعد فورا عن الأشخاص المصابين أو التجمعات عموماً.
- لبس الكمامات فى الأماكن المزدحمة.
- و لو وجدت عندك الأعراض وشكيت إن عندك الفيروس متتحركش من بيتك وبلاش تروح أى مستشفى أو صيدلية إلا لما تتصل بالطبيب أو الأرقام المخصصة منعاً لإنتشار الفيروس.
الكلام عن تقوية المناعة بفيتامين C أو الثوم أو العسل لا يوجد ما يثبت صحته فى تقليل الإصابة بالفيروس
إيه هي الحاجات اللي ممكن تنقلك كورونا بقي ؟
- الموبايل
الموبايل هو أسهل حاجة ممكن أنها تنقلك الفيروس لأنه بيتجمع عليه أي فيروسات و بكتريا، عشان كدا لو أنت برا البيت قدامك حلين…
١- متلمسش وشك بإيدك
٢- وتطهر الموبايل و تمسحه بالكحول
بعد ما تروح بيتك اغسل ايدك و طهر الموبايل بقطنه و شوية كحول
- الكمامة
مفاجأة مش كده ! ، الكمامة القماش سهل الفيروس يلتصق عليها ، ممكن و انت بتشيلها بإيدك ينتقل من الكمامة لإيدك فتلمس وشك و ينتقل الفيروس كده ليك
لبس الكمامات مهم ، لكن ضروري تخلي بالك ان بعد ما تقلع الكمامة تغسل ايدك جيداً
- دراع البلايستيشن
بعد تعليق الدراسة هتنزل تلعب بلاي ستيشن طبعاً مهنسدق ، الدراع اللي هتلعب بيه ده بقي ممكن يبقي سبب نقل عدوى ليك ، ممكن تاخد معاك ازازة الكحول و طهره بيها ، او لو نسيت الكحول اغسل ايدك علي طول بدون ما تلمس وشك انت مش عارف مين إستخدمه قبلك وعنده عدوي ولا لا !!
- المصافحة
طبعاً دي مش محتاجة كلام 🏃 بلاااش مصافحه نهائياً الفتره دي
- البوس وأحضان البنات
اخواتنا البنات يكتفوا بالسلام من بعيد بلاش احضان المطارات الفتره دي
- الكحة / العطس
لا مؤاخذة لما تيجي تكح او تعطس حط منديل علي بقك او مناخيرك عشان لو لاقدر الله مصاب بحاجة متنقلش العدوى او تحاول تقلل من فرص نشرها بقدر الامكان. ياريت مناديل ورقية وترميها علطول وتغسل إيديك بعدها بالماء والصابون
- الفلوس
الفلوس مليانة ميكروبات و فيروسات و ممكن الفيروس ينتقل منها من شخص للتاني ، يا اما تطلع فلوسك بالمنديل ، او بعد ما تطلعها تطهر ايدك بعدها
- اللعب في المناخير
بعد إذنك بلاش تلعب في مناخيرك اليومين دول ، عشان لو ما مُوتناش من كورونا هتموتنا من القرف
- دركسيون العربية
لو عربيتك بيستخدمها حد غيرك حاول تنضف الدركسيون و الفتيس أول بأول ، بعد كل استخدام بالكحول
- إستخدام أدوات شخصية
بلاش تستخدم الأدوات الشخصية بتاعت غيرك
- التجمعات
للمرة التريليون ياجماعه ، إلغاء الدراسة وقف لعدم التجمعات هدفهم تقليل نسب الإصابة قدر الامكان ، من فضلك اقعد في بيتك و بلاش تخرج إلا للضرورة ، تعامل مع الموضوع عادي جداً و بلاش قلق.
مصر عملت أجازة علشان تقلل التجمعات..
الناس تقعد فى البيت ❎
الناس تطلع رحلات والتجمعات تزيد✅